Ta manera ta ayera a nase un dia yamá dia di Rincon kaminda su meta prinsipal tabata pa por trese nos kustumbernan di ántes dilanti pa asina nos grandinan por kòrda nan infansia i nos hóbennan por mira i apresiá nos kustumbernan di ántes.

Asina añanan a bai pasando i e dia tambe a bai ta kresiendo na popularidat i tambe partisipante te ku awe nos ta na e di 34 selebrashon di nos grandioso manifestashon kultural ku ta e dia di Rincon.

​

E dia kultural akí ta kontribuí na ekonomia di Boneiru pa medio di turista ku kier mira kultura di un pais. E turista ta eksperensiá e produkto kultural riba “Dia di Rincon”.

Dor di kere den e logronan ku e dia ta trese kuné i kere den su desaroyo a pone ku na aña 2015 su mahestat Rei Willem Alexander i Reina Máxima a bishitá e dia di Rincon. Nos ta kere ku ta un honor ku nos bario di Rincon a wòrdu previligiá ku bishita di nos máksimo pareha real. Ta un gran  opurtunidat pa no solamente e bario di Rincon pero Boneiru kompletu demostrá  ta kon nos ta biba ku nos kultura, ekspresando ku nos ta orguyoso di ta un Boneriano.

​

Ku Dia di Rincon nos ta duna muestra di un desaroyo ku nos ántepasadonan a pasa den. Un desaroyo, un kultura, den kua nos ántepasadonan tabatin rèspèt pa mama tera i su naturalesa i tabata sinti responsabilidat pa e rekursonan di nos isla. Nan tabata usa loke naturalesa tabata duna pa por saka kuminda, remedi i materialnan pa nan famia i otronan den nesesidat.

​

Asina nos grandinan a lanta nos, ku rèspèt i frankesa. Meta di e dia no ta pa gana sèn, sino mas bien trese tur  famianan  huntu. Pa presensiá kosnan ku nos no ta mira mas i haña un imaginashon kon kosnan ta kambia drástikamente. Esaki ta e motibu ku lo bo mira hopi figuranan den nan bestuario di ántes. Lo bo kome òf purba kuminda i bebidanan ku den pasado tabata ser traha pa nos mes hendenan. Sera konosí ku artefakto i diferente fòrnunan na unda tabata kushiná áloe, kima karbon, kalki i tambe kuku, pan i tur delisianan di ántes. Lo bo por tende tambe nos músikantenan entoná kanto i bailenan riba instrumentonan kompletamente distinto for di lokual nos ta usando awendia. Tur nos ramadanan ta duna un bista kon nos grandinan tabata biba bou di ramada, soportando frieldat i kalor, bebiendo awa di roi i posnan pa sobrebibí sin ku a bira malu.

​

Ta nos tur mester komprondé meta di e fiesta i uni huntu den un solo pensamentu positivo pa asina Rincon por demostrá su kultura den arte den kuminda i den tur sentido di palabra.

Pasobra nos a proba nos rikesa di tin kapasidat kultural potensial pa mundu henter.

​

Ta p’esei ku nos di  komishon ta duna tur nos bishitantenan un kaluroso bonbiní pa pasa un dia inolvidabel den Rincon, pa saboriá i disfrutá de lo mihó di kosnan di pasado.

​

TA NOS TUR HUNTU TA HASI DIA DI RINCON.